Një 19-vjeçar është vënë në pranga nga policia e Tiranës, pasi plagosi aksidentalisht me armë zjarri shokun e tij 17-vjeçar. Në pranga kanë rënë edhe dy të rinj të tjerë, të cilët dyshohet se kanë kryer veprime që pengojnë zbardhjen e së vërtetës.
Ngjarja ka ndodhur rreth orës 01:40, në rrugën “Berit Beker”, ku policia mori njoftim për plagosjen e një të mituri me armë zjarri. Menjëherë në vendngjarje kanë mbërritur shërbimet e Sektorit për Hetimin e Krimeve të Rënda, për sqarimin e rrethanave dhe dokumentimin ligjor të rastit.
Nga hetimet paraprake rezulton se 19-vjeçari me iniciale R. S., ndodhej në banesën e tij duke i treguar një armë zjarri pistoletë shokut. Duke menduar se arma nuk kishte fishek në fole, ai e ka shkrepur aksidentalisht, duke plagosur 17-vjeçarin.
Policia sekuestroi armën e zjarrit që i riu e posedonte pa leje.
Në përfundim të veprimeve të para hetimore, u arrestua në flagrancë R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”.
Gjithashtu u arrestuan edhe shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.
17-vjeçari i plagosur ndodhet në spital, nën kujdesin e mjekëve, ndërsa hetimet vijojnë për zbardhjen e plotë të ngjarjes.
