Deputeti i Partisë Socialiste, Erion Braçe, ka komentuar debatin brenda PS-së dhe reagimin publik të Elisa Spiropalit ndaj kryeministrit Rama, i cili e ka paralajmëruar se do e përjashtojë nga PS për reagimet e saj “kritike” ndaj partisë.
I ftuar në “Kjo Javë”, Braçe tregoi se mbledhja e zhvilluar në PS ka zgjatur rreth katër orë, ndërsa diskutimi për Spiropalin ka zënë vetëm pak minuta, por refuzoi të zbulojë detaje nga debati mes saj dhe Ramës, duke thënë se “gjërat e shtëpisë nuk nxirren në publik”.
I pyetur nëse Elisa Spiropali duhet të përjashtohet nga PS, Braçe u përgjigj prerazi, “Jo!”
“Unë mendoj se PS e ka kaluar fazën kur mund të përjashtojë njerëz për mendime ndryshe”, tha ai, ndërsa komentoi edhe reagimin e saj ndaj kryeministrit në rrjetet sociale, për të cilin tha se nuk i pëlqeu.
“Nuk më pëlqeu ai status. Nuk më pëlqen asgjë që është jashtë dhe niset si shigjetë ndaj cilësdo shënjestër brenda PS-së, qoftë edhe me të drejtë”, tha deputeti, ndërsa theksoi se debatet duhet të bëhen përballë dhe jo publikisht.
Erion Braçe: Mbledhja ka zgjatur nja katër orë. Dhe kjo histori me zonjën Spiropali ka qenë rreth 5-6 minuta. Gjërat e shtëpisë nuk nxirren në publik. Gjërat e shtëpisë mbahen në shtëpi. Unë jam më rebeli, por jam edhe më jetëgjati në parti. Më jetëgjati në shtëpi, tani më thënë të drejtën. Dhe këta që shihni ju tani kanë ardhur pas meje.
Pyetje: A duhet të përjashtohet Elisa Spiropali?
Erion Braçe: Jo! Unë mendoj se PS e ka kaluar fazën kur mund të përjashtojë njerëz për mendime ndryshe.
Pyetje: Po ajo ishte e vendosur në statusin e saj, më thoshte “më përjashto”, sikur kishte një lloj mbushjeje.
Erion Braçe: Nuk më pëlqeu. Por gjithsecili nga ne ka një moment që mbushet. Edhe unë jam mbushur me Bashkinë e Tiranës, fjala bie.
Ndaj thashë që këto gjëra nuk zgjidhen me të lutur, as me të thënë. Kërko të bëhesh vetë dhe merri, zgjidhi. Gjithsecili nga ne e ka një moment që vjen edhe për arsye personale, por edhe për arsye të sjelljes së të tjerëve në raport me ne.
Gjithmonë duhet të ruajmë thelbin dhe parimësinë. Unë këtë kam pasur si parim timin brenda PS-së. Nuk më pëlqeu ai status.
Nuk më pëlqen asgjë që është jashtë dhe niset si shigjetë ndaj cilësdo shënjestër brenda PS-së, qoftë edhe me të drejtë. Më pëlqen që të jem ulur atje në tavolinë, ta shoh tjetrin përballë dhe t’i them në sy: “Po ti gabon dhe gabon shumë rëndë”.
Pyetje: Këto nuk u thanë?
Erion Braçe: Jo pra, po të kishte ndodhur kjo gjë, patjetër.
