PSG ka nisur lëvizjet për një transferim të madh në merkaton e verës. Klubi francez është në bisedime me Atlético Madrid për Julián Álvarez, një nga sulmuesit më të kërkuar në Europë.
Luis Enrique e dëshiron me çdo kusht sulmuesin argjentinas në Paris dhe drejtuesit e PSG janë gati të bëjnë një përpjekje serioze për ta bindur Atlético Madrid. Sipas raportimeve, operacioni mund të shkojë në shifra shumë të larta, rreth 140-150 milionë euro.
Marrëdhëniet mes drejtuesve të dy klubeve janë shumë të mira, gjë që mund ta ndihmojë procesin e negociatave. Megjithatë, gjithçka do të varet nga oferta përfundimtare, pasi Atlético Madrid ka bërë të qartë se Álvarez nuk do të largohet për më pak se 100 milionë euro.
Nëse shifra arrin në nivelet 140 apo 150 milionë euro, atëherë oferta do të ishte shumë e vështirë për t’u refuzuar nga klubi madrilen.
Agjentët e Julián Álvarez kanë kohë që po diskutojnë me disa klube për mundësinë e një largimi nga Atlético Madrid. PSG duket klubi më i vendosur për ta transferuar sulmuesin në sezonin 2026-27.
Nga ana tjetër, Atlético Madrid ka interes për dy lojtarë të PSG: Kang-in Lee dhe Gonçalo Ramos. Megjithatë, për momentin këto konsiderohen operacione të ndara nga tratativat për Julián Álvarez.
Sulmuesi 26-vjeçar ka pasur një sezon me ulje-ngritje. Ai ka shënuar 20 gola në të gjitha kompeticionet dhe ka dhënë 9 asistime, por nuk ka arritur të përsërisë shifrat e sezonit të tij të parë me Atlético Madrid, kur realizoi 29 gola në 57 ndeshje zyrtare.
Me kontratë deri në vitin 2030 dhe vlerë tregu rreth 90 milionë euro, Álvarez mbetet një nga sulmuesit më të rëndësishëm në qarkullim. Tani mbetet për t’u parë nëse ky do të jetë sezoni i tij i fundit me fanellën e Atlético Madrid.
