Xabi Alonso është larguar për pak kohë nga vëmendja e futbollit, duke pushuar me familjen, por emri i tij vazhdon të jetë në qendër të diskutimeve. E ardhmja e trajnerit spanjoll mbetet e hapur, ndërsa disa klube të mëdha po ndjekin me kujdes situatën e tij.
Sipas AS, Chelsea ka kontaktuar Xabi Alonso për ta bindur që të marrë drejtimin e skuadrës në Stamford Bridge. Pas një sezoni të trazuar, drejtuesit e klubit londinez po kërkojnë një trajner të ri, metodik dhe me ide të qarta, profil që përputhet me atë të Alonso.
Megjithatë, projekti i Chelsea ngre ende dyshime. Klubi aktualisht ndodhet jashtë zonës që siguron kualifikimin në Europë, një faktor që mund të ndikojë në vendimin e trajnerit. Gjithsesi, Alonso nuk do ta përjashtonte mundësinë për të marrë drejtimin e një skuadre pa pjesëmarrje europiane, siç ndodhi edhe te Bayer Leverkusen, ku arriti të fitonte Bundesliga në sezonin e tij të parë të plotë.
Një tjetër pistë që duket më e komplikuar është ajo e Liverpool. Xabi Alonso ka një lidhje të fortë me Anfield dhe ëndërron që një ditë të drejtojë aty, por për momentin Arne Slot duket se ka ende besimin e klubit, sidomos pas titullit të fituar në Premier League sezonin e kaluar.
Chelsea shpreson të përfitojë nga kjo situatë dhe të bindë trajnerin 44-vjeçar të pranojë projektin në Londër. Megjithatë, nuk përjashtohet mundësia që Alonso të presë edhe pak, në pritje të opsioneve më tërheqëse për të ardhmen e tij.
