Shoqata e Bankave ka bërë thirrje për kujdes të shtuar nga qytetarët për mbrojtjen e të dhënave personale, pasi janë shtuar rastet e vjedhjes së informacionit përmes platformave online. Sipas Blerina Tushës nga kjo Shoqatë, ky është një shqetësim serioz për institucionet financiare, pasi çdo problem me të dhënat e klientëve ndikon drejtpërdrejt edhe në besimin ndaj bankave.
Tusha ka sqaruar se mashtruesit virtualë përdorin kryesisht platforma blerjesh dhe postën elektronike për të marrë informacione sensitive. Ajo ka shpjeguar se qytetarët, duke iu besuar këtyre platformave, shpesh fusin të dhënat personale dhe madje edhe kodet e sigurisë, duke mundësuar që dikush tjetër të marrë kontrollin mbi llogaritë e tyre bankare.
“Aktualisht ky është një shqetësim real, jo vetëm për ne, por edhe për klientët tanë, të cilët bien viktima të mashtrimeve dhe humbasin informacionet e tyre të rëndësishme,” tha Blerina Tusha.
