Një valë sulmesh dhe linçimi vijojnë në rrjetet sociale ndaj artistëve që mbështetën kryebashkiakun Veliaj të premten në gjykatë. Objekt i sulmeve më të ashpra i madhi Robert Ndrenika. Për Report Tv aktori korife i skenës shqiptare thotë se nuk e kupton të gjithë këtë fushatë urrejtje. Ai vlerëson Erion Veliajn dhe marrëdhënien me të e cilëson si me një “bir për shpirt”.
“Po pse pra reagojnë kështu?! Hë, ma thuaj ti! Njeriu i di vetë gjërat e tij. E kam djalë të adoptuar! Ia njoh jetën mirë dhe ma njeh jetën mirë. E kam si djalin tim”, thotë në një reagim ekskluziv për Report Tv, aktori Robert Ndrenika
I madhi Robert Ndrenika, me qetësinë dhe përulësinë që i jep madhështia e një jete si korife i artit shqiptar, e sheh me përbuzje gjithë linçimin, fyerjet dhe fushatën e urrejtjes ndaj tij në rrjetet sociale e jo vetëm, vetëm për shkak të një gjesti mbështetjeje për kryebashkiakun Erion Veliaj në gjykatë.
I bindur se këtë do ta bënte sërish për Velian, që e vlerëson shumë si njeri dhe kryebashkiak, aktori që ka shënjuar jetët e çdo shqiptari me personazhet e tij, thotë se vendimin e mori aty për aty, siç do të bënte si për anëtarin e familjes.
“Më lajmëruan njerëz të afërt të Erionit se ishte seanca dhe më pyetën nëse doja të shkoja. Shkova pa u menduar dy herë.”, tregon Ndrenika.
Në një reagim ekskluziv për Report Tv, Ndrenika e shpërfill të gjithë atë urrejtje nga një grup njerëzish, të panjohur apo edhe deri në politikanë, teksa me emocion flet për marrëdhënien personale që ka me Veliajn, duke e cilësuar atë “bir për shpirt”.
“E kam bir për shpirt. E njoh dhe e vlerësoj, ia njoh jetën dhe ma njeh edhe ai timen. Nëse do të ketë sërish nevojë, prapë do të jem aty.”, thotë ai.
Sipas aktorit, lidhjet njerëzore nuk kufizohen vetëm te familja biologjike.
“Njeriu nuk ka të afërm vetëm prindërit, fëmijët apo motrën e vëllanë. Ka edhe njerëz që i zgjedh vetë rrugës dhe i bëhen të afërt.”, thotë për Report Tv, aktori Robert Ndrenika.
Jo vetëm si “bir për shpirt” por kreut të Bashkisë Tiranës ia njeh një meritë shumë të madhe. Njeriu që kaloi dekada në skenë, thotë se me projektin për teatrin e ri në kryeqytet, Erion Veliaj po realizon një ëndërr të madhe, jo vetëm të tij por të gjithë një brezi të artë të artistëve, që ai bën pjesë.
“Veç të tjerash, Erioni realizoi një ëndërr të madhe timen dhe të shumë artistëve: një teatër të madh, të bukur dhe modern në qendër të Tiranës, që shpejt do të jetë gati.”, thekson Ndrenika.
Në seancën e së premtes në gjykatën Administrative për padinë e kryebashkiakut Erjon Veliaj kundër prokurorit Ols Dado, përveç Robert Ndrenikës, edhe artistë të tjerë të skenës shqiptare ishin në sallë, aktorë, këngëtarë por edhe publicistë e gazetarë. Një shenjë mbështetjeje në përballjen që kryebashkiaku po bën për drejtësi prej muajsh.
