Toni Kroos ka komentuar mënyrën si PSG dhe Luis Enrique menaxhuan zëvendësimin e Ousmane Dembélé në gjysmëfinalen e Champions League ndaj Bayern Munich, duke bërë një krahasim që shumëkush e ka lidhur me situatën aktuale te Real Madrid.
Dembélé, fituesi aktual i “Topit të Artë” dhe një nga lojtarët më të rëndësishëm të PSG, u zëvendësua në minutën e 65-të të ndeshjes. Por reagimi i tij pas daljes nga fusha mori shumë vëmendje: ai i dha dorën trajnerit Luis Enrique dhe më pas vazhdoi të mbështeste shokët e skuadrës nga stoli.
Kroos e vlerësoi shumë këtë sjellje, duke theksuar se ajo tregon respektin që ekziston mes lojtarëve dhe trajnerit te PSG.
“Trajneri nxjerr nga loja lojtarin më të mirë në botë në minutën e 65-të. Ai del, nuk ka problem, i jep dorën trajnerit dhe më pas inkurajon shokët nga stoli”, u shpreh Kroos në podcastin e tij.
Fjalët e ish-mesfushorit gjerman janë parë nga shumë tifozë si një thumbim i tërthortë ndaj Real Madrid, ku këtë sezon nuk kanë munguar tensionet në dhomën e zhveshjes. Në rrjetet sociale, shumë e kanë krahasuar reagimin e Dembélé me situata të tjera te madrilenët, sidomos me zëvendësimin e Vinicius në El Clásico, që shkaktoi shumë polemika.
Kroos theksoi se sjellje të tilla tregojnë shumë për autoritetin e trajnerit dhe për mënyrën si ai e ka skuadrën nën kontroll.
“Askush nuk ankohet dhe kjo tregon shumë për respektin që ka një trajner. Tregon si një trajner arrin diçka të tillë dhe, mbi të gjitha, si dëshmon se merr vendimet e duhura”, shtoi ai.
Ish-lojtari i Real Madrid nuk u ndal me kaq, duke theksuar se shumë futbollistë të tjerë në një situatë të ngjashme do të reagonin ndryshe.
“E sheh si bërtet nga stoli për të ndihmuar shokët. Jo si 90 për qind e lojtarëve të tjerë që mendojnë se janë yjet e skuadrës, bëjnë gjeste në fushë dhe pastaj ulen në stol të mërzitur”, deklaroi Kroos.
Komentet e tij vijnë në një moment të vështirë për Real Madrid, ku situata e brendshme është bërë gjithnjë e më e tensionuar. Përplasja mes Federico Valverde dhe Aurélien Tchouaméni, që solli edhe masa disiplinore nga klubi, ka rritur edhe më shumë debatet për mungesën e lidershipit në dhomën e zhveshjes.
Nga ana tjetër, modeli i Luis Enrique te PSG po merr gjithnjë e më shumë vlerësime. Skuadra pariziene duket e bashkuar, e disiplinuar dhe e qartë në idetë e saj, ndërsa kualifikimi në finalen e dytë radhazi të Champions League ka forcuar bindjen se trajneri spanjoll ka ndërtuar një grup me autoritet dhe mentalitet fitues.
