Policia greke ka arrestuar katër persona të dyshuar si të përfshirë në vrasjen e mafiozit grek Jorgos Moskouris 55-vjeç, i njohur edhe si “Thamnakia”, ngjarje e ndodhur më 24 prill 2025 në Halandri të Athinës.
Sipas autoriteteve, të arrestuarit janë dy shtetas origjinë shqiptare, Dionis Kokoni dhe një person me mbiemër Jupe, si dhe dy shtetas grekë, Dhimitris Aleksopoulos dhe Alexandros Petropoulos.
Hetuesit dyshojnë se ata kanë pasur rol logjistik në organizimin e atentatit, duke siguruar armë, automjete dhe mbështetje për autorët e huaj që hynë në Greqi vetëm për ekzekutimin e mafiozit grek dhe u larguan menjëherë pas tij.
Viktima, Jorgos Moskouris, u qëllua me armë automatike jashtë një klinike private në Halandri dhe mbeti i vdekur në vendngjarje.
Hetimet dhe pistat e krimit
Policia greke po heton një pistë të lidhur me krimin e organizuar ndërkombëtar dhe përplasjet për kontrollin e kontrabandës së duhanit. Në qendër të hetimeve për organizatorët e mundshëm përmendet një figurë e njohur si “Entik”, që dyshohet se vepron në rrjetet e mafias rusishtfolëse dhe ndodhet në Dubai.
Gjithashtu, hetimi përfshin edhe emrin e Janis Lalas, i cili më parë kishte bashkëpunuar me viktimën dhe më pas dyshohet se është afruar me grupe rivale kriminale.
Detaje të atentatit
Sipas policisë, atentati është kryer në mënyrë profesionale, autorët kishin ngritur pritë jashtë klinikës dhe hapën zjarr me kallashnikov ndërsa Moskouris po i afrohej automjetit të tij. Pas sulmit, ata u larguan me një makinë të vjedhur, e cila më vonë u gjet e djegur në zonën e Patimas në Halandri.
Autoritetet greke thonë se pavarësisht arrestimeve, ekzekutorët e drejtpërdrejtë të vrasjes mbeten ende në arrati dhe kërkimet për ta vijojnë.
