Një grup i madh banorësh të Niklës në Krujë protestuan këtë të martë, duke kërkuar me ngulm rindërtimin e shkollës së mesme të bashkuar “Ramazan Karaj”. Protesta, e cila zgjati disa minuta, bllokoi rrugën kryesore të njësisë administrative, duke tërhequr vëmendjen e qytetarëve dhe autoriteteve lokale.
Shkolla “Ramazan Karaj” ka pësuar dëmtime të konsiderueshme nga tërmeti i 26 nëntorit 2019. Prej asaj kohe banorët kanë marrë premtime të shumëta nga autoritetet, por puna për rindërtimin e shkollës ende nuk ka nisur.
Prej afro katër vitesh, fëmijët e zonës frekuentojnë shkolla alternative dhe zhvillojnë mësimin me turne, një situatë e cila ka krijuar vështirësi të mëdha për ata që ndjekin arsimin. Protestuesit kërkuan nga Ministria e Infrastrukturës që të nisë sa më parë punimet për rindërtimin e shkollës, e cila aktualisht ka 455 nxënës që ndjekin arsimin nga ai parashkollor deri në arsimin e mesëm.
Kjo protestë shërben si një thirrje për vëmendje dhe veprim për të siguruar një ambient arsimor të sigurt dhe cilësor për të rinjtë e Niklës.
