Një analizë e re ka ngrritur pikëpyetje serioze mbi mënyrën si komunikojmë: njerëzit po flasin gjithnjë e më pak me zë çdo vit,dhe rënia është mjaftueshëm e madhe për të tërhequr vëmendjen e studiuesve.
Studimi i publikuar në Perspectives on Psychological Science tregon se përdorimi i përditshëm i fjalëve të shqiptuara ka rënë me rreth 338 fjalë në vit, në periudhën 2005–2019.
Kërkuesit analizuan të dhëna nga më shumë se 2,000 pjesëmarrës në 22 studime të ndryshme, duke përdorur regjistrime audio nga jeta e përditshme. Pjesëmarrësit përfshinin moshat nga 10 deri në 94 vjeç. Në vitin 2005, një person mesatar fliste rreth 16,000 fjalë në ditë. Deri në vitin 2019, ky numër kishte rënë në afro 12,700.
Rënia është edhe më e theksuar tek të rinjtë nën 25 vjeç, të cilët humbasin mesatarisht 452 fjalë të folura në ditë çdo vit, krahasuar me 314 tek të rriturit më të mëdhenj. Megjithatë, trendi shfaqet në të gjitha grupmoshat, çka tregon se nuk është thjesht një fenomen i brezit të ri.
Studiuesit e lidhin këtë ndryshim me një botë ku po zhduken ndërveprimet e vogla të përditshme: pyetjet për rrugën, bisedat e shkurtra me shitësin apo përshëndetjet me fqinjët. Në vend të tyre, po zënë vend mesazhet, aplikacionet, kioskat automatike dhe komunikimi online.
Por, ndryshe nga tekstet, komunikimi me zë mbart tonin, ritmin, ngrohtësinë dhe praninë njerëzore. Studime të tjera të përmendura në analizë sugjerojnë se bisedat me zë krijojnë lidhje sociale më të forta sesa komunikimi me shkrim, edhe kur njerëzit mendojnë se të folurit mund të jetë i sikletshëm.
Në fund, fjalët e humbura nuk janë thjesht numra, ato përfaqësojnë kontakte të vogla sociale që po zhduken nga përditshmëria, duke ndryshuar gradualisht mënyrën sesi lidhemi me njëri-tjetrin.
