Kapiteni i Atlético Madrid, Jorge Resurrección Koke, foli në konferencën për shtyp para ndeshjes së parë gjysmëfinale të Champions League ndaj Arsenal, duke theksuar se përballje të tilla “vendosen nga detajet më të vogla”.
“Niveli i skuadrave është jashtëzakonisht i lartë. Duhet të jemi të vëmendshëm ndaj gjithçkaje, intensitetit, agresivitetit, dëshirës për të fituar, por njëkohësisht duhet të ruajmë qetësinë dhe përqendrimin”, u shpreh kapiteni i Atlético.
Koke pranoi se emocioni para një gjysmëfinaleje të Champions është i pashmangshëm.
“Sa më shumë afrohet ndeshja, aq më shumë ndihen emocionet dhe ato fluturat në stomak. Është si kur ke takimin e parë me vajzën e parë që ke njohur, diçka e ngjashme. Pastaj gjithçka largohet gjatë nxehjes. Është një ndeshje futbolli, jemi të etur dhe të emocionuar për të luajtur një gjysmëfinale, por duhet të qëndrojmë të qetë dhe të luajmë siç kemi bërë deri tani”, shtoi ai.
Për Koke, kjo do të jetë gjysmëfinalja e katërt e Champions League me Atlético Madrid.
“Po e shijoj shumë këtë sezon. Nuk luan çdo vit në një gjysmëfinale të Champions League. Për Atlético Madrid është hera e shtatë, ndërsa për mua e katërta. Duhet ta shijosh në maksimum, sepse nuk ndodh çdo vit”, tha mesfushori spanjoll.
Në moshën 34-vjeçare, Koke nuk është i habitur nga përgatitja fizike që ka treguar, përfshirë edhe 120 minutat e luajtura në finalen e Kupës së Mbretit.
“Me kalimin e viteve bëhet më e vështirë, kjo u ndodh të gjithë futbollistëve. Por çdo ditë jam më i motivuar për të qenë këtu dhe për të punuar si çdo vit. Kjo motivim më shtyn të arrij nivelin që kam treguar këtë sezon”, deklaroi ai.
Kapiteni foli edhe për objektivin e madh të Atlético në këtë fund sezoni.
“Ajo që ka ndodhur, ka ndodhur. Tani duhet të shijojmë gjysmëfinalen. Nuk shoh asgjë të pazakontë krahasuar me gjysmëfinalet e tjera. Thjesht po luajmë ndaj një skuadre fantastike si Arsenal dhe jemi shumë të motivuar. Nëse do të mund ta mbyllnim me titullin e Champions League, do të ishte diçka e jashtëzakonshme për të gjithë”, u shpreh Koke.
Në fund, ai pati edhe disa fjalë për Pablo Barrios, i cili po përballet me probleme dëmtimesh.
“Është një lojtar shumë i rëndësishëm për ne, me një të tashme dhe të ardhme shumë të ndritur. Ka pasur fat të keq me dëmtimet dhe ne humbasim energjinë e tij, cilësinë në lojë dhe qetësinë që sjell në fushë. I dërgoj shumë kurajo”, përfundoi kapiteni i Atlético Madrid.
