Milani ka nisur seriozisht punën për ndërtimin e skuadrës për sezonin 2026-27 dhe dy emra të mëdhenj janë në fokus: Alexander Sørloth dhe Leon Goretzka. Sipas La Gazzetta dello Sport, të dy lojtarët kanë dhënë sinjale pozitive për një transferim te kuqezinjtë.
Sulmuesi i Atletico Madrid shihet si kandidati kryesor për të udhëhequr repartin ofensiv në Champions League sezonin e ardhshëm. Norvegjezi është i hapur për një eksperiencë në Serie A dhe do të kërkojë largimin nga klubi spanjoll në fund të sezonit. Milani po përgatit një ofertë rreth 20 milionë euro plus bonuse, por gjithçka do të varet nga kërkesat e Atletico-s dhe zhvillimet në merkato.
Në mesfushë, objektivi kryesor është Leon Goretzka. Gjermani, i cili mund të largohet si lojtar i lirë, ka dhënë “dritën jeshile” për kalimin te Milani, por ka kërkuar që fillimisht të përfundojë sezonin me Bayern Munich. Kuqezinjtë janë gati t’i ofrojnë një kontratë trevjeçare me opsion rinovimi.
Kontaktet mes palëve janë intensifikuar ditët e fundit, ndërsa roli i Massimiliano Allegri ka qenë kyç në bindjen e lojtarit. Megjithatë, konkurrenca për Goretzka mbetet e fortë dhe Milani nuk e konsideron ende të mbyllur marrëveshjen.
Drejtuesit e klubit, me CEO Furlani dhe drejtorin sportiv Tare, po planifikojnë lëvizjet e mëdha, të cilat do të përshpejtohen sapo të sigurohet matematikisht kualifikimi në Champions League. Objektivi është i qartë: një Milan më i fortë dhe konkurrues në të gjitha frontet sezonin e ardhshëm.
