Claudio Ranieri është shumë pranë largimit nga roli i këshilltarit të lartë te Roma, ndërsa pritet vetëm vendimi përfundimtar nga familja Friedkin. Pas polemikave të fundit me trajnerin Gian Piero Gasperini, divorci mes palëve duket gjithnjë e më i mundshëm.
Sipas raportimeve, situata është tensionuar pas deklaratave të Ranierit para ndeshjes Roma-Pisa, kur ai foli për merkaton dhe përzgjedhjen e Gasperinit si trajner. Këto komente nuk janë pritur mirë as nga vetë Gasperini dhe as nga ambienti verdhekuq, duke krijuar probleme të brendshme në klub.
Edhe pse ditët e fundit kishte pasur disa sinjale qetësuese, drejtuesit e Romës duket se tashmë po orientohen drejt ndërprerjes së bashkëpunimit me Ranierin, i cili kishte kontratë si këshilltar deri më 30 qershor 2027. Nëse largimi konfirmohet, eksperienca e tij e fundit me Romën do të mbyllet pas rikthimit në Trigoria në nëntor 2024.
Për momentin nuk ka ende një njoftim zyrtar, por gjithçka lë të kuptohet se fundi i bashkëpunimit është shumë pranë. Ranieri, i cili më parë kishte kaluar te Roma si lojtar, trajner dhe më pas drejtues, mund të mbyllë shumë shpejt edhe këtë kapitull me klubin verdhekuq.
