Çmimi i naftës në Kosovë ka shënuar një rënie të lehtë ditën e sotme, duke arritur në 1.65 euro për litër, 3 centë më pak krahasuar me të martën, kur tregtohej me 1.68 euro për litër.
Sipas vendimit të Ministrisë së Industrisë, Ndërmarrësisë, Tregtisë dhe Inovacionit, janë publikuar çmimet maksimale të lejuara për derivatet e naftës, të cilat kanë hyrë në fuqi nga ora 10:00 dhe janë të detyrueshme për të gjithë operatorët ekonomikë në vend.
Përveç naftës, edhe benzina ka pësuar një rënie të lehtë, duke zbritur në 1.39 euro për litër nga 1.41 euro sa ishte të martën. Ndërkohë, çmimi i gazit ka mbetur i pandryshuar, në 0.88 euro për litër.
Rënia e çmimeve vjen pas një periudhe rritjeje të tyre, e cila nisi më 28 shkurt, në kohën kur tensionet ndërkombëtare dhe zhvillimet në Lindjen e Mesme ndikuan në tregjet globale të energjisë. Mbyllja e Ngushticës së Hormuzit, një rrugë detare kyçe për transportin e rreth 20 për qind të naftës në nivel botëror, pati ndikim të drejtpërdrejtë në shtrenjtimin e derivateve.
Megjithatë, ulja e fundit e çmimeve konsiderohet si një lehtësim i vogël për konsumatorët, ndonëse tregu mbetet i ndjeshëm ndaj zhvillimeve globale.
