Kryetari i Bashkisë së Tiranës, Erion Veliaj kërkon që seancat gjyqësore në Gjykatën Administrative për padinë e tij kundër prokurorit Ols Dado të transmetohen live.Ai i ka dërguar një shkresë zyrtare gjyqtarit të çështjes, Hazbi Balliu, ku thekson se diçka e tillë është e parashikuar në ligj dhe se kërkesa e tij lidhet vetëm me zbatimin në praktikë.
“Kërkoj nga Gjykata që të lejojë praninë e një kamere të mediave për transmetimin e drejtpërdrejtë të çdo seance, ose, në alternativë, që vetë Gjykata të mundësojë transmetimin live të çdo seance përmes një sinjali institucional të kontrolluar prej saj, në mënyrë që publiku të ketë akses të drejtpërdrejtë në zhvillimin e procesit”, Veliaj, Kryetari i Bashkisë së Tiranës.
Veliaj nënvizon se aktualisht sistemi juridik e aplikon transmetimin live të seancave gjyqësore, duke sjellë si shembull Gjykatën Kushtetuese.
“Në veçanti, në Gjykatën Kushtetuese, seancat që nuk zhvillohen me dyer të mbyllura transmetohen live për publikun, si një mjet për të garantuar transparencë reale dhe akses të drejtpërdrejtë të qytetarëve në procesin gjyqësor. Kjo praktikë tregon se transmetimi nuk cenon zhvillimin normal të gjykimit, por përbën një instrument të ligjshëm dhe të përshtatshëm për realizimin efektiv të publicitetit. Në këto kushte, lejimi i transmetimit të drejtpërdrejtë, qoftë përmes një kamere të vetme të mediave, qoftë përmes një sinjali institucional të kontrolluar nga vetë Gjykata, përbën mjetin e vetëm efektiv për të garantuar që publiciteti i gjykimit të mos mbetet formal, por të realizohet në mënyrë të plotë dhe reale.
Erion Veliaj ka hapur një proces gjyqësor në Gjykatën Administrative për të kundërshtuar emërimin e Ols Dados si prokuror, duke e akuzuar këtë të fundit se ndaj tij, ka bërë hetim me porosi.
