Aurelien Tchouameni ka folur hapur për racizmin ndaj Vinicius, por edhe për periudhën e vështirë që ai vetë kaloi derisa u përshtat te Real Madrid.
Mesfushori francez, i cili këtë sezon është kthyer në një pjesë shumë të rëndësishme të skuadrës madrilene, tregoi në Pivot Podcast se rruga e tij deri te ky status nuk ka qenë aspak e lehtë. Ai kujtoi momentet kur tifozët e “Santiago Bernabeu” e vërshëllyenin sa herë prekte topin.
“Më kishin kthyer në kokë turku. Në 10-20 minutat e para, stadiumi më vërshëllente sa herë prekja topin. Ose ajo situatë të shkatërron, ose i thua vetes se kjo është pjesë e lojës dhe përqendrohesh vetëm te ajo që mund të kontrollosh, pra te paraqitja jote. Niveli i presionit te Real Madrid është krejt tjetër. Njerëzit do të flasin për gjithçka që bën, qoftë mirë apo keq”, u shpreh ai.
Tchouameni tregoi se ajo periudhë e ndihmoi shumë në aspektin mendor dhe e bëri më të fortë.
“Të gjithë flisnin për mua, për mënyrën si luaja. Një ose dy vite më parë isha lojtari i keq, më vërshëllenin në stadium, kështu që kam kaluar shumë dhe kjo më ka ndihmuar mendërisht. Tani e di se çfarëdo që të bëj, njerëzit do të flasin, ndaj thjesht i injoroj. Të luash për Real Madrid është skena më e madhe në sport: presioni është privilegj”, deklaroi francezi.
Ai u ndal edhe te incidentet raciste ndaj Vinicius, duke reaguar me tone shumë të forta.
“E quajtën majmun. Mendoj se hapi tjetër do të jetë ndalimi i ndeshjes. Nuk do të lejojmë që ato skena të ndodhin sërish”, tha Tchouameni.
Deklarata e tij shihet si një qëndrim i fortë në mbështetje të Vinicius, në një kohë kur sulmuesi brazilian vazhdon të jetë shpesh në qendër të episodeve të papranueshme në stadiume.
