Një ngjarje e pazakontë është raportuar nga Bulevardi i Ri në Tiranë, ku ditën e djeshme është vënë re prezenca e disa grave të mbuluara me shami, të cilat qëndronin pranë një furgoni të kuq me derë të hapur, dhe tentonin të afronin fëmijët e zakonshëm pranë mjetit të çuditshëm.
Sipas raportimeve, ishte një nënë e para që ka ngritur shqetësimin për këtë situatë që ajo e konsideron serioze dhe potencialisht të rrezikshme për sigurinë e fëmijëve në Tiranë.
Sipas saj, në zonën e Bulevardit të Ri është vënë re një minifurgon, brenda të cilit ndodheshin tre gra të mbuluara me shami. Ajo pretendon se këto persona u afroheshin fëmijëve që ndodheshin vetëm, pa praninë e prindërve, duke i përfshirë në biseda.
Preteksti i përdorur ishte kërkesa për ndihmë në përkthimin e disa fjalëve nga shqipja në anglisht, me arsyetimin se dëshironin të mësonin gjuhën. Megjithatë, ajo që ka ngritur shqetësim është fakti se fëmijët ftoheshin të afroheshin pranë mjetit, ndërsa pyetjet që u drejtoheshin dukeshin të rastësishme dhe pa një qëllim të qartë, si fjalë të zakonshme për natyrën apo aktivitetet e përditshme.
Nëna shprehet se kjo mënyrë afrimi ngre dyshime, pasi sipas saj, qëllimi i vetëm mund të jetë tërheqja e fëmijëve pranë automjetit, duke krijuar një situatë potencialisht të rrezikshme.
Ky rast ka shkaktuar shqetësim mes prindërve të zonës, të cilët kërkojnë më shumë vëmendje dhe prani nga autoritetet, si dhe verifikimin e menjëhershëm të kësaj situate.
Autoritetet ende nuk kanë bërë një reagim për këtë rast.
