Të paktën 16 persona janë plagosur pas një sulmi me armë që ndodhi në një shkollë profesionale në rrethin Siverek të provincës Şanlıurfa, në jug të Turqisë.
Sipas autoriteteve lokale, një person i armatosur dyshohet se ka hyrë në ambientet e shkollës dhe ka hapur zjarr me armë gjahu, duke plagosur nxënës dhe mësues.
Raportohet se disa nga nxënësit kanë tentuar të shpëtojnë duke u hedhur nga dritaret, ndërsa zona është rrethuar menjëherë nga forcat e shumta policore dhe njësitë speciale.
Guvernatori i Şanlıurfas konfirmoi se dy mësues dhe dy nxënës janë në gjendje mesatare, ndërsa të plagosurit e tjerë po marrin trajtim në spitalin shtetëror të Siverekut. Ai shtoi se autori i dyshuar, një ish-nxënës i lindur në vitin 2007, është gjetur i vdekur brenda shkollës pasi dyshohet se ka qëlluar veten.
Autoritetet kanë nisur një hetim të plotë për zbardhjen e ngjarjes, ndërsa shkolla është evakuuar plotësisht dhe situata është vënë nën kontroll.
