Milan pësoi një humbje të rëndë ndaj Udinese, duke vënë sërish në diskutim vendin në Champions League. Skuadra friulane u shfaq më e organizuar, më e qartë në lojë dhe krijoi më shumë raste, ndërsa kuqezinjtë zhvilluan një nga paraqitjet më zhgënjyese të javëve të fundit.
Udinese kaloi në avantazh në minutën e 27-të, kur një devijim i Bartesaghi përfundoi në rrjetë dhe i dha epërsinë miqve. Vetëm dhjetë minuta më vonë, Ekkelenkamp dyfishoi rezultatin pas një aksioni të ndërtuar mirë, duke goditur edhe më shumë moralin e Milan.
Në pjesën e dytë, kuqezinjtë u përpoqën të reagonin, por pa qartësi dhe pa forcën e duhur për të ndryshuar ritmin e sfidës. Në minutën e 71-të, Atta vulosi gjithçka me golin e tretë, duke mbyllur përfundimisht ndeshjen dhe duke i dhënë Udinese një fitore të merituar.
Përveç humbjes, një tjetër sinjal shqetësues për Milan erdhi edhe nga atmosfera në “San Siro”, ku Rafael Leao u vërshëllye disa herë nga tifozët, si pasojë e një paraqitjeje të dobët dhe mungesës së ndikimit në lojë. Edhe eksperimenti taktik i Allegrit me skemën 4-3-3 nuk dha efekt, pasi skuadra u pa e ngadaltë, pa ide dhe shumë e brishtë në mbrojtje.
Kjo humbje i jep mundësi rivalëve të afrohen ndjeshëm në renditje, ndërsa presioni mbi Milan rritet ndjeshëm në fazën më vendimtare të sezonit. Nëse nuk reagon shpejt, rreziku për të humbur një vend në Champions League bëhet gjithnjë e më real.
