Janë zbardhur detaje të reja nga vrasja me armë zjarri e 41-vjeçarit Artur Çangu, ngjarje që ndodhi mbrëmjen e së premtes në fshatin Vijon, në zonën e Niklës në Fushë-Krujë. Ndërkohë, policia vijon kërkimet për autorin e dyshuar, Eduart Afmataj.
Sipas burimeve nga grupi hetimor, mes viktimës dhe autorit kishte prej rreth dy vitesh një konflikt të vazhdueshëm që lidhej me çështje pronësie. Përplasja mes tyre ka arritur kulmin mbrëmjen e së premtes, kur 41-vjeçari kishte shkuar pranë banesës së prindërve të tij dhe kishte parkuar automjetin aty pranë.
Ky veprim ka sjellë reagimin e menjëhershëm të Afmatajt, i cili ka dalë nga banesa dhe ka nisur një debat me Çangun, duke pretenduar se automjeti i kishte bllokuar rrugën. Debati është përshkallëzuar shpejt në përplasje fizike dhe në një moment autori i dyshuar ka marrë një armë gjahu tip “çifte”, me të cilën ka qëlluar për vdekje 41-vjeçarin.
Pas ngjarjes, Afmataj dyshohet se ka telefonuar policinë për të njoftuar për krimin dhe më pas është larguar nga vendi i ngjarjes, duke humbur gjurmët. Forcat e policisë kanë zhvilluar kontrolle në zonë, por deri tani nuk kanë arritur ta lokalizojnë.
Ndërkohë, grupi hetimor po vijon punën për kapjen e autorit të dyshuar dhe për zbardhjen e plotë të rrethanave të kësaj ngjarjeje të rëndë.
