Prokuroria e Tiranës ka goditur një rast evazioni fiskal dhe ka shpallur në kërkim shtetasin Olition Buzi, i cili rezulton të jetë administratori i subjektit “Buzi Sport”.
Sipas njoftimit zyrtar të Prokurorisë mësohet se subjekti në administrim të këtij shtetasi nuk kishte deklaruar 3.7 milionë euro të ardhura.
Nga hetimet e kryera disa mujore, Prokuroria në bashkëpunim me Drejtorinë e Hetimit Tatimor, bënë të mundur zbulimin dhe ndalimin e këtij evazioni fiskal nga subjekti tregtar ‘Buzi Sport’ si dhe u ekzekutua vendimi i Gjykatës së Shkallës së Parë të Juridiksionit të Përgjithshëm Tiranë për kontrollin e vendeve të ushtrimit të aktivitetit nga ky subjekt.
Gjatë hetimeve, u ushtruan kontrolle në 8 adresa të lidhura me subjektin “Buzi Sport” shoqërinë e fiskalizimit, ku u sekuestruan provat materiale që përfshijnë njësi kompjuterike, telefona celularë, tableta dhe vlera monetare në valuta të ndryshme që arrijnë në 8,000,000 lekë, të cilat nuk ishin të justifikuara me dokumentacion ligjor.
Hetimet treguan se ‘Buzi Sport’ përdorte një sistem kompjuterik të paautorizuar për monitorimin dhe lëshimin e faturave tatimore. Ky sistem, që operonte përmes platformës online të palicencuar “store.dyqanimen.com”, mundësonte lëshimin e faturave të falsifikuara, të cilat përmbanin mangësi të elementeve të kërkuara nga legjislacioni tatimor dhe ishin të pa fiskalizuara.
Në disa raste, subjekti lëshonte fatura me vlera më të mëdha, ndërkohë që deklaronte një vlerë shumë më të vogël për qëllime tatimore, duke shmangur kështu pagesën e detyrimeve tatimore.
