Pas largimit të presidentit të Federatës Italiane, Gabriele Gravina, edhe Gigi Buffon ka dhënë dorëheqjen nga posti i drejtuesit të delegacionit të kombëtares italiane. Ish-kapiteni i Italisë vendosi të largohet pas humbjes ndaj Bosnjës, disfatë që i kushtoi Azzurrëve mungesën në Botëror për herë të tretë radhazi.
Buffon e bëri publik vendimin e tij përmes një postimi në rrjetet sociale, ku shpjegoi se pas tërheqjes së Gravinës u ndje i lirë të bënte atë që e konsideronte një veprim të përgjegjshëm. Ai u shpreh se dorëheqja erdhi si një reagim i menjëhershëm dhe i sinqertë, i lindur nga dhimbja e madhe pas ndeshjes me Bosnjën. Sipas tij, ishte një ndjenjë spontane, e shoqëruar me lot dhe me një boshllëk që, siç tha, e ndan me të gjithë tifozët italianë.
Më tej, Buffon theksoi se është e drejtë që personat që do të marrin drejtimin tani të kenë lirinë për të zgjedhur njeriun që e konsiderojnë më të përshtatshëm për këtë rol. Ai pranoi hapur se objektivi kryesor ishte rikthimi i Italisë në Botëror, por ky mision nuk u arrit. Ish-portieri legjendar shtoi se gjatë kohës së tij në detyrë është përpjekur të japë maksimumin, duke u bërë një urë lidhëse mes niveleve të ndryshme të kombëtareve dhe duke ndihmuar në ndërtimin e një projekti që nis nga moshat e reja dhe shkon deri te U21.
Në fund, Buffon u nda me një mesazh plot emocion, duke thënë se do ta mbajë këtë eksperiencë në zemër, me gjithë dhimbjen që la pas, dhe me mirënjohje për gjithçka që i ka dhënë. Pavarësisht fundit të hidhur, ai e mbylli mesazhin me fjalët: “Forza Azzurri gjithmonë.”
