Napoli po shqyrton mundësinë e pezullimit të Romelu Lukakut, pasi sulmuesi belg nuk u paraqit në stërvitjen e skuadrës. Klubi italian bëri të ditur të martën se lojtari nuk iu përgjigj thirrjes për rikthimin në stërvitje, duke qëndruar në Belgjikë për të vazhduar rikuperimin fizik.
Në një njoftim zyrtar, Napoli theksoi se rezervon të drejtën për të marrë masa disiplinore ndaj lojtarit, si edhe për të vendosur nëse do ta mbajë apo jo në skuadër. Kjo situatë ka krijuar tension mes klubit dhe sulmuesit, ndërsa prania e tij në ndeshjen e fundjavës ndaj Milanit duket pothuajse e pamundur.
Nga ana e tij, Lukaku reagoi në rrjetet sociale duke sqaruar se nuk ka ndërmend t’i kthejë shpinën Napolit. Ai u shpreh se dëshira e tij më e madhe është të luajë dhe të fitojë me skuadrën, por theksoi se aktualisht duhet të sigurohet që të jetë 100 për qind gati fizikisht, pasi problemet e fundit e kanë ndikuar edhe mendërisht.
Sipas testeve mjekësore të kryera me kombëtaren belge, Lukaku ka inflamacion dhe lëng në muskulin fleksor të kofshës. Në vitin 2026, ai ka luajtur vetëm 48 minuta në gjashtë ndeshje në të gjitha kompeticionet, megjithëse arriti të shënojë golin e tij të parë të sezonit më 28 shkurt ndaj Hellas Veronës, në fitoren 2-1 që forcoi Napolin në vendet që të çojnë në Champions League.
