Skënder Hita ka marrë zyrtarisht detyrën si Drejtor i Përgjithshëm i Policisë së Shtetit.
Në fjalën e tij të parë pas marrjes së detyrës, Hita u shpreh se kjo është dita më e rëndësishme e karrierës së tij, ndërsa theksoi se e konsideron këtë rol jo thjesht një arritje personale, por një përgjegjësi të madhe ndaj qytetarëve dhe Policisë së Shtetit.
Ai premtoi forcim të luftës kundër krimit dhe korrupsionit, rritje të sigurisë dhe përmirësim të imazhit të policisë në vend.
“Betohem për të mbajtur me nder flamurin e Policisë së Shtetit”, tha Hita.
Hita: Sot është një ditë e rëndësishme e karrierës time në Policinë e Shtetit. Sot kam nderin të marr përgjegjësinë për këtë detyrë, më të lartën në organizatën tonë. Këtë kurorëzim nuk e shoh thjesht si një arritje personale, por si një përgjegjësi të madhe ndaj qytetarëve dhe policisë së shtetit. Falenderoj kryeministrin dhe qeverinë për besimin e dhënë dhe çdo koleg me të cilin kam ndarë këtë rrugëtim. Mbetet sfidë thellimi i rezultateve dhe përmirësimi i imazhit të policisë. Policia nuk është thjesht një institucion që ofron shërbim, është vendi ku qytetari gjen mbështetjen, drejtësi dhe besim. Prioritetet tona janë të qarta, luftë pa kompromis kundër krimit dhe korruspionit duke filluar dhe nga radhët tona, rritje e sigurisë në shkolla, formimi i rendit dhe sigurisë në të gjithë territorin e vendit, rritje akoma më shumë e transparencës ndaj qytetarëve, forcim i bashkëpunimit me partnerët ndërkombëtarë. Policia e Shtetit është e juaja qytetarë, ajo do të jetë gjithmonë në krahun tuaj. Siguria juaja është detyrimi ynë më i madh. Bashkëpunimi me ju është thelbësor.
