Bernardo Silva pritet të mbyllë aventurën e tij me Manchester Cityn në fund të këtij sezoni. Sipas gazetarit të njohur Fabrizio Romano, mesfushori ofensiv portugez ka marrë vendimin përfundimtar që të largohet nga klubi anglez pas shumë vitesh suksesi me fanellën e “Qytetarëve”.
Raportohet se 31-vjeçari ka tashmë disa oferta në tavolinë nga klube në Europë, Arabia Saudite dhe MLS. Megjithatë, Bernardo nuk po nxiton të vendosë për të ardhmen e tij, pasi aktualisht është i fokusuar plotësisht te Manchester City dhe planifikon të zgjedhë ekipin e ri vetëm pas përfundimit të sezonit.
Bernardo Silva u transferua te City në vitin 2017 nga Monaco për 50 milionë euro dhe që prej atëherë është kthyer në një nga lojtarët më të rëndësishëm të skuadrës. Me fanellën e klubit anglez ai ka zhvilluar 449 ndeshje, ka shënuar 76 gola dhe ka dhënë 77 asistime.
Kontrata e tij aktuale me Manchester Cityn skadon këtë verë, ndërsa vlera e kartonit të tij vlerësohet rreth 27 milionë euro. Tani mbetet të shihet se cili do të jetë hapi i ardhshëm në karrierën e portugezit, pasi një epokë e rëndësishme e tij në “Etihad” duket se po shkon drejt fundit.
