Trajneri i Italisë, Gennaro Gattuso, doli në konferencë për shtyp në prag të ndeshjes vendimtare ndaj Bosnjës në Zenicë, duke theksuar se skuadra e tij është plotësisht e vetëdijshme për rëndësinë e kësaj përballjeje. Ai u shpreh se Italia po luan për një objektiv shumë të madh dhe se ndaj një kundërshtari të fortë, fizikisht të fuqishëm dhe me cilësi, do të duhet një paraqitje me karakter të lartë.
Gattuso vuri theksin te shpirti garues, duke kujtuar se në historinë e Italisë ka pasur raste kur skuadra ka triumfuar jo sepse ishte më e forta në letër, por sepse kishte vendosmëri, mentalitet dhe uri për fitore. Sipas tij, pikërisht kjo nuk duhet t’i mungojë Italisë në ndeshjen ndaj Bosnjës. Trajneri pranoi se ndoshta skuadra mund të mos shkëlqejë në aspektin estetik, por për të më e rëndësishmja është që lojtarët të tregojnë forcë mendore dhe aftësi për të vuajtur në fushë.
Ai foli me shumë respekt edhe për Bosnjën, duke nënvizuar se nuk sheh asnjë ndryshim mes kësaj përballjeje dhe ndeshjeve të tjera të vështira si ajo ndaj Uellsit. Sipas Gattusos, Bosnja është një skuadër e vërtetë, që e di mirë çfarë kërkon në fushë dhe që do ta vendosë Italinë përpara një testi shumë fizik. Për këtë arsye, trajneri italian kërkoi guxim, qetësi dhe përqendrim maksimal nga ekipi i tij.
Edhe kapiteni Gianluigi Donnarumma dha një mesazh të fortë para kësaj sfide, duke thënë se skuadra e di shumë mirë peshën e fanellës që mban dhe përgjegjësinë ndaj të gjithë italianëve. Portieri theksoi se Italia nuk mund të lejojë një tjetër dështim dhe se tani është momenti për ta rikthyer kombëtaren aty ku e meriton. Mesazhi nga kampi italian ishte i qartë: ndaj Bosnjës kërkohet një Itali e fortë, e bashkuar dhe e gatshme të japë gjithçka për kualifikimin.
