Sekretari i Përgjithshëm i Partisë së Lirisë, Tedi Blushi kërkoi që SPAK të marrë në dorë kallëzimin e bërë prej tyre për arrestimin e ish presidentit Ilir Meta në tetor të vitit 2024, duke e cilësuar si rrëmbim mafioz dhe terrorist.
Në një konferencë për media, Blushi theksoi se kanë kaluar 18 muaj nga rrëmbimi i tij dhe autoritetet e drejtësisë nuk kanë vepruar.
Sipas tij, arrestimi i ish Presidentit u urdhërua nga kryeministri Edi Rama, ndërsa ‘aksionin’ e ndërmorën persona që ai i cilësoi si banditë të Ergys Agasit dhe Ilir Prodës.
“Kanë kaluar rreth 18 muaj nga rrëmbimi mafioz i presidentit të Partisë së Lirisë Ilir Meta, dhe ende nuk është zhvilluar asnjë hetim, as administrativ e as gjyqësor për zbardhjen e këtij krimi shtetëror të paprecedentë në historinë e shtetit por të krahasueshëm me aktin terrorist të rrëmbimit të ish kryeministrit italian Aldo Moro në vitin e largët 1978.
Rrëmbimi terrorist i presidentit Meta vazhdon të mbetet qëllimisht i pazbardhur sepse zbardhja do të konfirmonte faktin se ky krim i urdhëruar nga Edi Rama me aprovimin e ministrisë së brendshme dhe policinë e shtetit është kryer jo nga punonjës të policisë por sipas informacioneve të besueshme nga banditë të përzgjedhur personalisht nga Ergys Agasi dhe Ilir Proda ndër anëtarët e grupeve më të rrezikshme kriminale, kryesisht të Durrësit dhe Elbasanit.”, u shpreh Blushi.
