Disa futbollistë italianë u kapën nga kamerat duke festuar pas kualifikimit të Bosnjës, gjë që shkaktoi reagime të menjëhershme dhe të ashpra në rrjetet sociale boshnjake. Shumë tifozë e konsideruan këtë si mungesë respekti ndaj Dzekos dhe shokëve të tij.
Videoja u bë virale brenda pak minutash dhe ndezi debat të madh në Bosnjë. Në rrjetet sociale nuk munguan komentet kritike, ku italianët u akuzuan për arrogancë dhe për një festë të papërshtatshme. Madje, disa reagime paralajmëruan se kjo sjellje “do të merret parasysh në Zenicë”.
Pas ndeshjes me Irlandën e Veriut, kamerat e RAI-t u fokusuan te Dimarco, Pio Esposito, Vicario, Meret dhe Tonali, të cilët po festonin pas fitores së Bosnjës ndaj Uellsit. Të kaltërit sapo kishin siguruar kualifikimin dhe po analizonin kundërshtarin e së martës. Kamerat kapën edhe reagimin e Tonalit pas një gabimi të boshnjakëve në kohën shtesë, kur mesfushori komentoi një rast të humbur nga Demirovic me fjalët: “Pothuajse shënoi”.
Megjithatë, momenti që shkaktoi më shumë polemika ishte festa e disa lojtarëve italianë pas suksesit të Bosnjës, e cila u pa si e tepruar dhe jo e hijshme. Reagimet në rrjetet sociale ishin të menjëhershme dhe shumë të ashpra, duke e dënuar këtë veprim pa asnjë tolerancë.
Pamjet krijuan siklet edhe gjatë transmetimit live, aq sa u komentuan edhe nga Lele Adani, zëri i dytë në ndeshjen ndaj Irlandës së Veriut. Ai ironizoi situatën duke thënë: “Thatë se nuk do ta transmetonit, por ja që e bëtë… Duhet të festojmë të martën, jo sot.”
