Dy ditë më parë 80-vjeçari Shefit Rrapaj, nga fshati Kuman i Roskovecit, vrau bashkëshorten e tij Dashuri Rrapaj dhe më pas i dha fund jetës, e sot ai është varrosur në heshtje dhe i braktisur nga familjarët.
Ceremonia e tij mortore u zhvillua pasditen e djeshme në varrezat e fshatit, e sipas banorëve, në varrim morën pjesë vetëm disa punonjës të shërbimeve funerale të bashkisë, por asnjë nga 9 fëmijët apo të afërmit nuk ishin të pranishëm.
“Na thanë që e varrosën. Pashë makinën funerale dhe shkova. Ishin vetëm 3-4 veta dhe e çuan në fund fare. Nuk e prisnim kurrë. Ishin njerëz shumë të mirë, u habitëm të gjithë kur e dëgjuam”, është shprehur një prej banorëve të zonës.
Drejtori i ndërmarrjes pblike të Bashkisë së Roskovecit, Arben Duka, ka thënë se policia ka negociuar për një kohë të gjatë me familjarët për të tërhequr trupin e Shefitit nga morgu, po ka rezultuar pa sukses, në këto kushte funeralin e ka kryer Bashkia me punonjësit e saj.
Kujtojmë se ditën e djeshme ka fokur vëllai i së ndjerës Dashuri Rrapaj në një prononcim për mediat, ku u shpreh se ajo do të varrosej në vendlindjen e saj, më vete, dhe u shpreh se autori ishte i dhunshëm dhe problematik.
