Jürgen Klopp ka mohuar prerazi zërat që e lidhin me pankinën e Real Madridit, duke i cilësuar ato si tërësisht të pavërteta. Gjatë një eventi në Mynih, trajneri gjerman u ndal te spekulimet e fundit dhe u shpreh qartë se nuk ka asgjë konkrete pas këtyre lajmeve.
Klopp ironizoi mënyrën se si po qarkullojnë këto raportime, duke vënë në dyshim burimin e tyre dhe duke theksuar se jo çdo gjë që shkruhet mund të konsiderohet lajm i vërtetë. Ai madje bëri shaka me idenë e një telefonate të mundshme nga Florentino Pérez, për të treguar se gjithë kjo histori nuk ka asnjë bazë reale.
I bezdisur nga këmbëngulja e mediave për këtë temë, gjermani sqaroi se as Real Madridi dhe as përfaqësuesit e tij nuk kanë pasur asnjë kontakt me të apo me agjentin e tij. Sipas Klopp, gjithçka që është shkruar deri tani është thjesht “marrëzi” dhe nuk ka pasur asnjë telefonatë apo lëvizje konkrete nga klubi madrilen.
Trajneri, i cili aktualisht mban një rol drejtues në departamentin e futbollit të Red Bull, hodhi poshtë edhe zërat e tjerë për të ardhmen e tij, përfshirë ata që e lidhnin me kombëtaren gjermane. Megjithatë, ai la të kuptohet se nuk e konsideron veten të tërhequr përfundimisht nga pankina dhe se në të ardhmen mund të rikthehet sërish si trajner.
Në fund, Klopp e mbylli çështjen me humor, duke dërguar edhe një mesazh ironik për madrilenët: fillimisht duhet të vijë telefonata, pastaj mund të flitet për diçka konkrete. Me këtë deklaratë, ai i dha fund, të paktën për momentin, spekulimeve për një kalim të mundshëm te Real Madridi.
