Galatasaray ka konfirmuar se Victor Osimhen i është nënshtruar me sukses operacionit pas dëmtimit të pësuar në krah gjatë ndeshjes së javës së kaluar ndaj Liverpoolit në Champions League. Klubi turk bëri të ditur se ndërhyrja u krye në spitalin Maslak Acıbadem nga mjeku i klubit, Yener İnce.
Sulmuesi nigerian u detyrua të linte fushën pas dëmtimit të marrë në humbjen 4-0 ndaj Liverpoolit në “Anfield”, në ndeshjen e kthimit të fazës së 1/8-ve. Më herët, Galatasaray kishte konfirmuar se Osimhen kishte pësuar frakturë në parakrahun e djathtë.
Sa i përket kohës së rikuperimit, klubi nuk ka dhënë ende një afat zyrtar të saktë. Megjithatë, raportime të fundit në Turqi dhe Nigeri flasin për një mungesë që mund të zgjasë rreth 4 deri në 6 javë, ndaj Galatasaray pritet të mbetet pa një nga lojtarët e saj më të rëndësishëm në një moment delikat të sezonit.
Ky është një lajm i rëndë për kampionët turq, të cilët po luftojnë në frontin vendas dhe tani duhet të përballojnë mungesën e golashënuesit të tyre kryesor. Te Galatasaray shpresojnë që rikuperimi i Osimhen të ecë sipas planit dhe sulmuesi të rikthehet sa më shpejt në fushë.
