Një ngjarje e rëndë është regjistruar mbrëmjen e sotme në fshatin Gjashtë në Sarandë, ku një shtetas rreth 65-vjeç ka humbur jetën.
Sipas informacioneve zyrtare nga Policia, Gëzim Bizioni ka humbur jetën në oborrin e shtëpisë së tij. Shkak për këtë ngjarje mendohet të jetë bërë një konflikt për motive të dobëta me 42-vjeçarin Admir Ferik Beqiri.
Beqiri ka shkuar në oborrin e banesës së viktimës dhe e ka qëlluar me një shishe qelqi Gëzimin. Për pasojë e lëndimeve të rënda që mori, 65-vjeçari humbi jetën në vendin e ngjarjes.
Autori i dyshuar është shoqëruar nga uniformat blu për veprime të mëtejshme.
Njoftimi i Policisë:
Sarandë / Informacion paraprak
Sot, në fshatin Gjashtë, Sarandë, dyshohet se për motive të dobëta, shtetasi A. B., rreth 42 vjeç, ka goditur me shishe qelqi shtetasin G. B., rreth 65 vjeç.
Si pasojë e dëmtimeve të marra, shtetasi G. B. ka ndërruar jetë në vendngjarje, në oborrin e banesës së tij.
Shërbimet e Policisë shkuan menjëherë në vendngjarje dhe, falë reagimit të shpejtë, bënë të mundur kapjen e autorit të dyshuar, shtetasin A. B., i cili u shoqërua në Komisariatin e Policisë Sarandë për veprime të mëtejshme hetimore.
Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes.
