Një pjesëtar i marinës franceze, duke përdorur një aplikacion për të regjistruar performancën e tij në ecje sportive ka transmetuar pozicionin e saktë të aeroplanmbajtëses së vendit të tij.
Franca e dërgoi luftanijen “Charles de Gaulle” dhe fregatat shoqëruese në Mesdhe në fillim të marsit, fare pak pas nisjes së luftës së dyshes SHBA-Izrael ndaj Iranit.
Mjeti lundrues ndodhet në lindje të Mesdheut që prej 9 marsit, në kuadër të atij që presidenti Macron e ka quajtur “një angazhim tërësisht mbrojtës” në mbështetje të aleatëve.
Gazeta “Le Monde” raportoi se më 13 mars marinari bëri ecje sportive në bordin e anijes, që po lundronte në veri-perëndim të Qipros.
Sipas gazetës, këtë e tregoi aplikacioni “Strava”, i përdorur gjerësisht për aktivitete fizike, ndërkohë që pamje satelitore treguan se mjeti luftarak ndodhej në të njëjtin vend dhe në të njëjtën kohë.
I njëjti marinar ka bërë ecje sportive edhe në Kopenhagën të Danimarkës në fund të shkurtit dhe në një urë në Malmo të Suedisë, ku sipas të dhënave të aplikacionit “Strava” ndodhej asokohe anija “Charles de Gaulle”.
Forcat e armatosura franceze deklaruan se masa serioze do të merren nëse raportimi i gazetës rezulton i vërtetë, pasi pjesëtarët e marinës informohen vazhdimisht për vënien në rrezik të sigurisë duke përdorur aplikacione të tilla.
Profilet në aplikacionet sportive kanë dhënë informacione të rëndësishme edhe më parë. Në vitin 2024, sërish gazeta “Le Monde” raportoi se truprojat e presidentëve Macron, Biden dhe Putin kishin dhënë pa dashje informacione për vendndodhjen e tyre teksa i shoqëronin në udhëtim.
Ndërsa në 2018-n, harta e “Strava” tregoi vendndodhjen e personelit ushtarak të Shteteve të Bashkuara dhe aleatëve në Irak, Siri dhe Afganistan.
