Irani ka lëshuar dy raketa balistike me rreze të mesme drejt bazës ushtarake të përbashkët SHBA-Britani në Diego Garcia, duke rritur ndjeshëm tensionet në rajon.
CNN shkruan se raketat u hodhën të premten në mëngjes, por asnjëra nuk arriti të godasë objektivin. Baza ndodhet rreth 3,800 kilometra larg territorit iranian.
Objekti në Diego Garcia është një nga pikat më të rëndësishme strategjike të SHBA-së jashtë vendit, duke shërbyer si bazë për bombardues të rëndë dhe operacione ushtarake në distanca të gjata.
Nga ana tjetër, agjencia gjysmëzyrtare iraniane Mehr konfirmoi sulmin, duke e cilësuar atë si një “hap të rëndësishëm” në drejtim të kërcënimit të interesave të SHBA-së dhe aleatëve të saj përtej rajonit të Azisë Perëndimore. Megjithatë, nuk u dha informacion nëse objektivi ishte goditur me sukses.
Deri tani nuk ka reagime zyrtare nga Shtëpia e Bardhë, Pentagoni apo autoritetet britanike.
Diego Garcia është pjesë e Ishujve Chagos, një territor nën kontrollin e Mbretërisë së Bashkuar, i cili ka qenë prej dekadash një pikë kyçe për operacionet ushtarake amerikane, përfshirë ndërhyrjet në Irak dhe misione të tjera në Azi.
Ngjarja vjen në një moment tensionesh të larta gjeopolitike dhe mund të sjellë reagime të mëtejshme nga SHBA dhe aleatët e saj.
