Sipas The Mirror, saga e transferimit të Marcus Rashford vazhdon të bëhet gjithnjë e më e nxehtë, me Manchester United që ka refuzuar edhe ofertën më të fundit të Barcelona-s për sulmuesin anglez.
Raportohet se klubi katalanas ka paraqitur një tjetër propozim për zgjatjen e huazimit të 28-vjeçarit, por pa pranuar të paguajë klauzolën e rënë dakord prej 26 milionë paundësh. Barcelona kërkon ta mbajë Rashfordin në formë huazimi deri në vitin 2027, duke shmangur kështu blerjen e detyrueshme të kartonit të tij.
Nga ana tjetër, Manchester United e ka kuptuar shumë mirë se paraqitjet e mira të Rashfordit me fanellën e Barcelonës ia kanë rritur ndjeshëm vlerën në treg. Për këtë arsye, “Djajtë e Kuq” janë gati të kërkojnë jo më pak se 50 milionë paundë gjatë merkatos së verës nëse Barcelona nuk vendos ta blejë përfundimisht lojtarin.
Situata mes dy klubeve është bërë mjaft e tensionuar dhe, sipas raportimeve, marrëdhëniet mes Barcelona-s dhe Manchester United janë në një moment shumë delikat për shkak të kësaj çështjeje. Burime pranë zhvillimeve bëjnë të ditur se palët janë pranë një përplasjeje të madhe nëse nuk gjendet një zgjidhje e shpejtë.
Në këtë sezon, Rashford ka zhvilluar 38 ndeshje me Barcelonën, duke shënuar 10 gola dhe duke dhënë 13 asistime. Ndërkohë, sipas Transfermarkt, vlera e tij aktuale në treg llogaritet rreth 40 milionë euro.
E ardhmja e sulmuesit anglez mbetet ende e paqartë, por një gjë duket e sigurt: çështja Rashford po kthehet në një nga telenovelat më të nxehta të merkatos.
