Sipas Fabrizio Romano, Manchester City po përgatitet për mundësinë e një ndryshimi të madh në stol, në rast se Pep Guardiola vendos të largohet nga klubi.
Eliminimi i City-t në fazën e 1/8-ave të UEFA Champions League ka rikthyer sërish zërat për të ardhmen e teknikut spanjoll. Në këtë skenar, emri që kryeson listën për ta zëvendësuar është Enzo Maresca.
Raportohet se edhe kampi i Maresca-s është tashmë në dijeni të situatës dhe të interesimit konkret nga Manchester City. Megjithatë, çdo zhvillim mbetet i lidhur drejtpërdrejt me vendimin përfundimtar të Guardiolës, i cili ende nuk ka dhënë një sinjal përfundimtar për të ardhmen e tij.
Ndërkohë, pavarësisht një tjetër eliminimi nga Real Madrid, Guardiola nuk e konsideron klubin spanjoll si kundërshtarin më të vështirë të karrierës së tij. Tekniku katalanas ka treguar se skuadra që i ka shkaktuar sfidën më të madhe në karrierë ka qenë një tjetër.
Nëse Guardiola largohet, Manchester City duket se e ka tashmë të qartë drejtimin që dëshiron të marrë, me Enzo Maresca-n që shihet si kandidati më i fortë për të marrë në dorë një nga pankinat më të rëndësishme në futbollin europian.
