Një sulm me raketa ka goditur qytetin industrial Ras Laffan në Katar, ku ndodhet një nga qendrat më të mëdha të përpunimit të naftës dhe objekti më i madh i prodhimit të gazit të lëngshëm (LNG) në botë.
Sipas kompanisë shtetërore QatarEnergy, goditjet kanë shkaktuar dëme të konsiderueshme dhe zjarre në zonë.
“Ekipet e reagimit emergjent u dërguan menjëherë për të kontrolluar zjarret që rezultuan, pasi janë shkaktuar dëme të mëdha. I gjithë personeli është llogaritur dhe nuk është raportuar asnjë viktimë në këtë kohë”, thuhet në reagimin e kompanisë në rrjetet sociale.
Edhe Ministria e Brendshme e Katarit konfirmoi se situata është vënë nën kontroll. Zjarri është “vënë nën kontroll paraprakisht” dhe nuk ka pasur të lënduar, njoftuan autoritetet.
Ndërkohë, Katari e cilësoi sulmin si një kërcënim serioz për sigurinë kombëtare dhe stabilitetin rajonal, duke përdorur tone të forta ndaj Iranit.
“Sulmet e paturpshme me raketa… janë një kërcënim i drejtpërdrejtë për sigurinë tonë kombëtare dhe stabilitetin e rajonit”, thuhet në reagimin zyrtar.
Ministria e Jashtme shtoi se situata po përshkallëzohet. “Pala iraniane vazhdon politikat e saj përshkallëzuese që po e shtyjnë rajonin drejt humnerës…”, thuhet në njoftm.
Gjithashtu, autoritetet paralajmëruan se nuk do të qëndrojnë pasive ndaj sulmit.
“Katari rezervon të drejtën e tij për t’u përgjigjur… dhe nuk do të hezitojë të marrë të gjitha masat e nevojshme për të mbrojtur sovranitetin dhe sigurinë e qytetarëve të tij”, thuhet në deklaratë.
Sulmi rrit tensionet në rajon, duke ngritur shqetësime për ndikimin në tregjet globale të energjisë dhe stabilitetin në Gjirin Persik.
