Mesfushori i Milanit, Youssouf Fofana, ka bërë një rrëfim të sinqertë për vështirësitë që po kalon këtë sezon, duke pranuar se ndryshimi i rolit në fushë nuk e ka ndihmuar aspak, sidomos sa i përket shanseve për t’u rikthyer te Kombëtarja e Francës.
Në një intervistë për L’Equipe, francezi shpjegoi se me ardhjen e ndryshimeve taktike te Milani është detyruar të luajë më i avancuar në krahun e djathtë, ndonëse ky nuk është pozicioni ku ai ndjehet më mirë. Sipas tij, roli ideal mbetet ai në qendër të mesfushës, aty ku mund të kontrollojë ritmin e lojës dhe të rikuperojë topa.
“Kur të thonë se do të luash më lart në fushë, në fillim gëzohesh. Por më pas kuptova se nuk është domosdoshmërisht ajo që dua. E bëj për skuadrën, por nuk mendoj se ky rol më ndihmon për të ardhmen”, deklaroi Fofana.
Mesfushori theksoi se nuk ndihet ende mjaftueshëm i fortë në këtë pozicion dhe pranoi se kjo situatë mund t’i ketë kushtuar edhe vendin në planet e Didier Deschamps për Botërorin. Fofana nuk grumbullohet me Francën që nga tetori i vitit 2024 dhe rrezikon të mbetet jashtë edhe në miqësoret e radhës.
Pavarësisht zhgënjimit, lojtari i Milanit nuk e ka humbur shpresën. Ai u shpreh se dëshira për të shkuar në Botëror mbetet shumë e madhe, por për ta bërë këtë duhet të mbyllë sezonin në një nivel më të lartë sesa e ka nisur.
