Barcelona ka arritur marrëveshjen për rinovimin e kontratës me Hansi Flick, duke i besuar trajnerit gjerman vazhdimin e projektit në stolin e skuadrës katalanase. Presidenti Joan Laporta ka konfirmuar se palët kanë gjetur akordin dhe se zyrtarizimi pritet të bëhet shumë shpejt.
Sipas deklaratave të Laportës, Flick do të firmosë një kontratë të re me kushte financiare të përmirësuara, ndërsa bashkëpunimi mes palëve do të zgjasë të paktën edhe për një tjetër periudhë të rëndësishme. Presidenti i Barcelonës është shprehur se trajneri gjerman është i lumtur në klub dhe se ka dhënë tashmë pëlqimin e tij për marrëveshjen e re.
“Hansi ka rënë dakord dhe është shumë i lumtur këtu”, është mesazhi i qartë që vjen nga kreu i klubit, duke treguar se Barcelona kërkon stabilitet dhe vazhdimësi në pankinë.
Hansi Flick mori drejtimin e Barcelonës në verën e vitit 2024 dhe deri tani ka regjistruar 104 ndeshje në krye të skuadrës, me 78 fitore, 10 barazime dhe 16 humbje. Shifrat e tij kanë bindur drejtuesit katalanas, të cilët tashmë janë gati t’i besojnë zyrtarisht vazhdimin e projektit.
Rinovimi i Flick shihet si një lëvizje e rëndësishme për të ardhmen e Barcelonës, me Joan Laportën që mban kështu premtimin për të siguruar vazhdimësinë e trajnerit gjerman në “Camp Nou”.
