Trajneri kroat Igor Tudor ndodhet në një moment kritik të aventurës së tij në stol, me të ardhmen që varet nga përballja e radhës kundër Liverpoolit.
Sipas raportimeve të MatchDay Central, ndeshja ndaj skuadrës së drejtuar nga Arne Slot konsiderohet vendimtare për fatin e Tudor në klub. Burimet bëjnë të ditur se drejtuesit i kanë vendosur trajnerit një ultimatum të qartë: vetëm një fitore ndaj Liverpoolit mund ta mbajë në detyrë.
Çdo rezultat tjetër, dhe veçanërisht humbja, pritet të sjellë largimin e menjëhershëm të teknikut kroat.
Situata te Tottenham është bërë edhe më e rëndë për shkak të ecurisë negative në kampionat. Skuadra ndodhet në një seri prej 11 ndeshjesh pa fitore në Premier League, çka ka rritur ndjeshëm presionin mbi stafin teknik dhe vetë Tudor.
Në këto rrethana, përballja me Liverpoolin shihet si një provë e fundit për trajnerin kroat, në një sfidë ku në lojë nuk është vetëm rezultati, por edhe e ardhmja e tij në pankinë.
Takimi është planifikuar të nisë në orën 17:30 me orën e Europës Qendrore.
