Inter ka ngadalësuar sërish ritmin në Serie A, duke barazuar 1-1 ndaj Atalantës në një ndeshje të mbushur me tension, polemika dhe protesta të shumta nga zikaltërit. Skuadra e Cristian Chivu nuk arriti ta menaxhonte avantazhin dhe në fund u ndëshkua, duke humbur dy pikë të rëndësishme në garën për titull.
Zikaltrit kaluan në avantazh në minutën e 26-të me Pio Esposito, i cili finalizoi bukur një aksion të ndërtuar nga Dimarco, Dumfries dhe Barella. Ishte goli i pestë në kampionat për sulmuesin e ri, që dukej se po i jepte Interit një fitore shumë të rëndësishme. Megjithatë, pavarësisht epërsisë, vendasit nuk arritën ta mbyllnin ndeshjen, edhe pse patën raste të mira, sidomos me Thuram.
Barazimi i Atalantës erdhi në minutën e 82-të dhe ndezi menjëherë polemika të mëdha. Sulemana, në tentativë për të arritur topin, rrëzoi Dumfries, por loja vazhdoi. Goditja e tij u ndal nga Sommer, ndërsa Krstovic përfitoi nga topi i kthyer dhe e dërgoi në rrjetë për 1-1. Lojtarët e Interit protestuan ashpër, duke kërkuar faull ndaj Dumfries, por arbitri dhe më pas edhe VAR e quajtën golin të rregullt.
Situata u tensionua aq shumë, sa trajneri Chivu u ndëshkua me dy kartonë të verdhë dhe u përjashtua për shkak të protestave. Në fund, Inter kërkoi edhe një penallti pas një kontakti mes Scalvini dhe Frattesit në zonë, por edhe në atë rast arbitri nuk akordoi asgjë. Kështu, zikaltërit morën vetëm një pikë dhe humbën mundësinë për t’u shkëputur më shumë në krye, ndërsa Atalanta doli me një barazim të vlefshëm nga një transfertë shumë e vështirë.
