Kimi Antonelli ka shkruar historinë në Formula 1, duke siguruar pole position në Çmimin e Madh të Kinës dhe duke u bërë piloti më i ri ndonjëherë që arrin këtë sukses. Talenti italian i Mercedesit i rrëmbeu këtij rekordi Sebastian Vettelit dhe i dha Italisë një pole position pas 17 vitesh, që nga koha kur Giancarlo Fisichella e arriti këtë në Spa në vitin 2009.
Paraqitja e Antonellit ishte edhe më mbresëlënëse, pasi dita e tij nuk kishte nisur mirë. Ai e mbylli Sprintin në vendin e pestë, pas një starti të gabuar dhe një penalizimi për përplasjen me Isack Hadjar. Megjithatë, italiani reagoi menjëherë në kualifikuese dhe tregoi se po rritet me shpejtësi të jashtëzakonshme.
Mercedes dominoi plotësisht kualifikueset, me Antonellin në vendin e parë dhe George Russell në të dytin. Britaniku pati një problem teknik në fillim të Q3, me gjasa elektrik, por arriti të rikthehej në pistë në momentet e fundit dhe të siguronte vendin e dytë. Pas dy makinave të Mercedesit u renditën Ferrari-t e Lewis Hamilton dhe Charles Leclerc, që do të nisen nga vendi i tretë dhe i katërt.
McLaren dha sinjale përmirësimi me Oscar Piastri në vendin e pestë dhe Lando Norris në të gjashtin, ndërsa Pierre Gasly bëri një paraqitje shumë të mirë me Alpine, duke zënë vendin e shtatë. Max Verstappen u rendit i teti me një Red Bull larg formës së viteve të fundit, ndërsa Hadjar dhe Bearman plotësuan dhjetëshen e parë.
Pavarësisht dominimit të Mercedesit në kualifikuese, Ferrari ka treguar në Sprint se mund të jetë shumë e rrezikshme në garë. Për këtë arsye, nisja e së dielës pritet të jetë shumë e fortë, me Hamilton dhe Leclerc që do të tentojnë të sulmojnë menjëherë dy makinat e para. Gara për Çmimin e Madh të Kinës do të nisë nesër në orën 08:00.
Nisja e garës në Kinë:
1. Antonelli (Mercedes) 1’32″064
2. Russell (Mercedes) 1’32″286
3. Hamilton (Ferrari) 1’32″415
4. Leclerc (Ferrari) 1’32″428
5. Piastri (McLaren) 1’32″550
6. Norris (McLaren) 1’32″608
7. Gasly (Alpine) 1’32″873
8. Verstappen (Red Bull) 1’33″002
9. Hadjar (Red Bull) 1’33″121
10. Bearman (Haas) 1’33″292
11. Hülkenberg (Audi) 1’33″354
12. Colapinto (Alpine) 1’33″357
13. Ocon (Haas) 1’33″538
14. Lawson (Racing Bulls) 1’33″765
15. Lindblad (Racing Bulls) 1’33″784
16. Bortoleto (Audi) 1’33″965
17. Sainz (Williams) 1’34″317
18. Albon (Williams) 1’34″772
19. Alonso (Aston Martin) 1’35″203
20. Bottas (Cadillac) 1’35″436
21. Stroll (Aston Martin) 1’35″995
22. Perez (Cadillac) 1’36″906
