Real Madrid do të zbresë në fushë ndaj Elche me një skuadër të cunguar dhe me shumë pak alternativa në dispozicion. Álvaro Arbeloa ka vetëm 14 lojtarë të ekipit të parë të gatshëm, ndërsa do të plotësojë listën me gjashtë futbollistë nga akademia për të formuar grupin prej 20 lojtarësh.
Situata është bërë edhe më e vështirë vetëm tri ditë para ndeshjes në “Etihad”, pasi madrilenët kanë plot 10 mungesa për sfidën e kësaj mbrëmjeje. Jashtë kanë mbetur Militao, Asencio, Alaba, Carreras, Mendy, Bellingham, Ceballos, Mastantuono për shkak pezullimi, si edhe Rodrygo e Mbappé. Në këto kushte, Arbeloa po mendon edhe për rotacion, në mënyrë që emra si Tchouameni apo Valverde të pushojnë, por numri i madh i mungesave e komplikon çdo plan.
Për të plotësuar skuadrën, trajneri i Realit i është drejtuar akademisë, duke grumbulluar Diego Aguado, Thiago, Manuel Ángel, Yáñez, Palacios dhe portierin Mestre. Në mbrojtje, opsionet janë pothuajse të detyruara, me Courtois në portë dhe para tij Carvajal, Rüdiger, Huijsen dhe Fran García. Kjo do t’i jepte pushim Trent, i cili pritet të mbetet në stol.
Në mesfushë, Arbeloa duhet të zgjedhë mes Manuel Ángel dhe Thiago, të cilët mund të luajnë pranë Camavingas, me Brahim dhe Güler në krahë, edhe pse me role të lëvizshme. Në sulm, dyshja e mundshme pritet të jetë Vinicius dhe Gonzalo. Formacioni i mundshëm i Real Madrid ndaj Elche është: Courtois; Carvajal, Rüdiger, Huijsen, Fran García; Brahim, Manuel Ángel ose Thiago, Camavinga, Güler; Gonzalo dhe Vinicius.
Ndërkohë, Elche vjen në këtë përballje me vetëm dy mungesa, Héctor Fort dhe John, të dy të dëmtuar. Pjesa tjetër e skuadrës është në dispozicion, përfshirë edhe kapitenin Bigas. Megjithatë, forma e ekipit mbetet shqetësuese, pasi Elche ka dhjetë ndeshje radhazi pa fitore, me gjashtë humbje dhe katër barazime, duke u afruar rrezikshëm me zonën e rënies nga kategoria.
