Federico Valverde ka zbuluar një detaj interesant pas fitores së thellë 3-0 të Real Madrid ndaj Manchester City në ndeshjen e parë të fazës së 1/8-ave të Champions League.
Mesfushori uruguaian ishte protagonisti absolut i mbrëmjes, duke realizuar tre gola, por ai mund ta kishte mbyllur sfidën edhe me katër, nëse do të kishte marrë përsipër goditjen e penalltisë.
Sipas vetë Valverde, ishte Vinicius Junior ai që i ofroi mundësinë për ta ekzekutuar penalltinë, por në fund uruguaiani dhe pjesa tjetër e skuadrës e shtynë brazilianin që ta merrte vetë përgjegjësinë nga pika e bardhë.
“Vini Jr. më pyeti nëse doja ta gjuaja penalltinë. Vini është një legjendë e Real Madrid, është një mik i madh, dhe unë bashkë me shokët e tjerë i thamë që ta godiste ai. A e humbi Vini? Kjo ndodh, është pjesë e futbollit”, deklaroi Valverde për TNT.
Pavarësisht penalltisë së humbur, Real Madrid arriti një fitore shumë të rëndësishme në shtëpi dhe mori një avantazh të madh përpara ndeshjes së kthimit.
Takimi i dytë mes Real Madrid dhe Manchester City do të luhet të martën, më 17 mars, në “Etihad”, me fillim nga ora 21:00.
