Bodo/Glimt vazhdon të befasojë Europën. Pas eliminimit të Interit, skuadra norvegjeze ka hedhur një tjetër hap të madh në Champions League, duke mposhtur Sportingun 3-0 në ndeshjen e parë të fazës së 1/8-ave dhe duke iu afruar çerekfinaleve.
Në “Aspmyra Stadion”, ekipi i drejtuar nga Knutsen zhvilloi një ndeshje shumë të fortë dhe dominoi sidomos në pjesën e parë. Edhe pse kampionati norvegjez ka përfunduar prej më shumë se dy muajsh dhe nis sërish vetëm këtë fundjavë, Bodo/Glimt tregoi ritëm, guxim dhe organizim, sikur të ishte në mesin e sezonit.
Norvegjezët krijuan disa raste të mira që në fillim, me Hauge dhe Evjen që iu afruan golit. Avantazhi erdhi pas rreth gjysmë ore lojë, kur Fet u pengua nga prapa në zonë nga Vagiannidis dhe arbitri akordoi penallti. Vetë Fet mori përsipër ekzekutimin dhe nuk gaboi, duke kaluar vendasit në epërsi.
Pak para fundit të pjesës së parë, Bodo/Glimt goditi sërish. Blomberg realizoi golin e dytë me një finalizim të saktë brenda zonës, duke ndezur edhe më shumë atmosferën në stadium dhe duke i dhënë skuadrës vendase një avantazh shumë të rëndësishëm para pushimit.
Në pjesën e dytë, nevoja për rezultat e detyroi Sportingun të dilte më shumë në sulm. Portugezët u përpoqën të krijonin rrezik sidomos nga krahu i djathtë, ku gjetën më shumë hapësira me Fresneda. Megjithatë, çdo kundërsulm i Bodo/Glimt jepte ndjesinë se goli i tretë ishte më afër sesa rikthimi i Sportingut në ndeshje.
Goli që vulosi gjithçka erdhi në minutën e 71-të. Dy sulmuesit Hauge dhe Hogh kombinuan bukur brenda zonës, me të parin që dha një top të ulët dhe të dytin që e shtyu lehtësisht në rrjetë për 3-0.
Me këtë fitore bindëse, Bodo/Glimt vazhdon ëndrrën europiane dhe konfirmon se nuk është më një surprizë e rastësishme, por një skuadër që di të luajë, të fitojë dhe të godasë edhe kundërshtarë me emër si Sporting.
