Paris Saint-Germain ka marrë një fitore spektakolare 5-2 ndaj Chelsea në një nga ndeshjet më të çmendura të mbrëmjes në Champions League, duke treguar forcë, karakter dhe autoritet në një përballje që për një moment dukej se po i rrëshqiste nga duart. Skuadra e Luis Enrique vuajti shumë, rezistoi nën presion dhe në fund shpërtheu në një pjesë të dytë të paharrueshme, me Khvicha Kvaratskhelian protagonist absolut.
PSG e nisi ndeshjen në mënyrën më të mirë të mundshme dhe kaloi në avantazh që në fillim me Barcola, i cili shënoi me të majtën dhe befasoi portierin Jorgensen. Parizienët përfituan nga hapësirat që lë shpesh Chelsea në mbrojtje, ndërsa skuadra londineze vazhdoi t’i qëndrojë besnike stilit të saj të guximshëm, por edhe të rrezikshëm.
Megjithatë, Chelsea reagoi dhe arriti të barazojë me Malo Gusto, i cili përfitoi nga një moment pakujdesie i Nuno Mendes. Goditja e tij gjeti të papërgatitur Safonov, i cili nuk reagoi si duhet dhe lejoi rikthimin e anglezëve në lojë.
Në momentin më të vështirë për PSG, kur Chelsea po dukej më e rrezikshme, erdhi reagimi i kampionëve europianë. Pas një pritjeje vendimtare të Safonov, PSG doli shpejt në kundërsulm dhe Ousmane Dembélé e mbylli aksionin me gol, duke i dhënë sërish avantazhin skuadrës franceze pak para pushimit.
Pjesa e dytë nisi me të njëjtin ritëm të çmendur. Chelsea vazhdoi të sulmonte dhe gjeti përsëri golin e barazimit me Enzo Fernández, i cili hyri lehtësisht në zonë dhe finalizoi pas asistit të Neto. Në atë moment, gjithçka nisi nga e para dhe ndeshja dukej plotësisht e hapur.
Por pika e kthesës erdhi kur Jorgensen gaboi rëndë në ndërtimin e lojës. Portieri i Chelsea tentoi një pasim të rrezikshëm pa shikuar, topi u kap nga Kvaratskhelia dhe më pas Vitinha e dërgoi me qetësi në rrjetë për golin e tretë të PSG-së.
Ky gol e ringjalli plotësisht skuadrën e Luis Enrique. Chelsea humbi ekuilibrin, ndërsa PSG mori kontrollin emocional dhe teknik të ndeshjes. Pak më vonë, Kvaratskhelia realizoi një gol fantastik me një goditje të fuqishme dhe të pandalshme drejt trekëndëshit, duke ngritur në këmbë të gjithë “Parc des Princes”.
Në minutat shtesë, gjeorgjiani vulosi mbrëmjen e tij të jashtëzakonshme me golin e pestë personal të skuadrës dhe të dytin për vete, duke u kthyer në heroin absolut të Parisit. Edhe pse Chelsea pati një gol të anuluar me Joao Pedro, fundi i takimit i përkiste vetëm PSG-së.
Ishte një fitore që tregoi jo vetëm cilësinë, por edhe pjekurinë e PSG-së, një element që në të kaluarën shpesh i ka munguar skuadrës pariziene. Nën drejtimin e Luis Enrique, kjo skuadër po shfaq gjithnjë e më shumë personalitet dhe po dërgon një mesazh të qartë për gjithë Europën.
