Policia e Shkodrës vijon kërkimet për arrestimin e Barush alias Bajram Bregut, i cili dy ditë më parë arriti t’i shpëtojë efektivëve pasi qëlloi me armë zjarri në ajër për t’i kanosur gjatë një ndjekjeje. Në automjet me të ndodheshin edhe Ervis Baba, që drejtonte makinën, dhe një 17-vjeçar, të cilët u arrestuan nga policia.
Në dëshminë e dhënë para gjykatës, 43-vjeçari Ervis Baba ka deklaruar se nuk e njeh personin që ishte në automjet me të dhe se e kishte marrë rastësisht në rrugë. Ai ka mohuar gjithashtu çdo njohje me Barush Bregun, duke thënë se ndaloi pasi një person i bëri shenjë me dorë për ta marrë me makinë.
Ngjarja ndodhi më 10 mars rreth orës 15:10 në lagjen “Guerrile”, kur policia i bëri shenjë ndalimi automjetit për kontroll. Shoferi nuk iu bind urdhrit dhe u largua me shpejtësi, ndërsa gjatë ndjekjes dyshohet se pasagjeri Bajram Bregu qëlloi një herë në ajër dhe më pas u arratis. Bregu është shpallur në kërkim edhe më herët, pasi dyshohet se i siguroi armën autorit të vrasjes së dyfishtë në Shkodër në shtator 2025.
