Mesfushori kroat Luka Modric ia dedikoi fitoren e Milanit në derbin ndaj Interit ish-shokut të tij të skuadrës te Real Madridi, Sergio Ramos. Kuqezinjtë triumfuan 1-0 në “San Siro”, në një ndeshje shumë të rëndësishme për Serie A.
Pas përfundimit të takimit, Modric tregoi se ishte shumë i lumtur që kishte në tribunë mikun e tij të vjetër.
“Ishte një kënaqësi të shihja Sergion. Ai më telefonoi dje sepse donte të shihte ndeshjen. Duhej të fitonim, sepse kur kapiteni vjen këtu… duhet të fitojmë. Sonte kishte pak nga shpirti i tij në ajër”, u shpreh kroati për DAZN, duke buzëqeshur.
Ndeshja u vendos nga goli i Pervis Estupiñán në minutën e 35-të, i cili përfitoi nga një asist i Fofana dhe dërgoi topin në cepin e sipërm të portës së Sommerit.
Me këtë fitore, Milani ngushton diferencën me kreun e renditjes në 7 pikë, me 10 ndeshje të mbetura deri në fund të sezonit. Inter mbetet në vendin e parë me 67 pikë, ndërsa Milani renditet i dyti me 60 pikë.
Luka Modric është kthyer në një nga lojtarët më të rëndësishëm të skuadrës kuqezi. Kroati është tashmë titullar i padiskutueshëm në mesfushë dhe po kalon një “riní të dytë” në Itali pas largimit nga Real Madridi.
Edhe pse tashmë 40 vjeç dhe me kontratën që i përfundon në fund të sezonit, Modric vazhdon të tregojë formë të shkëlqyer. Objektivi i tij është të vazhdojë të luajë në nivel të lartë dhe të udhëheqë Kroacinë në Kupën e Botës së ardhshme.
