Çmimi i naftës në Kosovë po rritet dhe në disa pika karburanti ka arritur deri në rreth 1.45 euro për litër. Deri të shtunën, dizeli shitej nga 1.23 deri në 1.44 euro, ndërsa benzina nga 1.24 deri në 1.34 euro për litër.
Kryetari i Shoqatës së Naftëtarëve të Kosovës, Fadil Berjani, tha për Kosovapress se ndonëse tregu i derivateve në vend mbetet i stabilizuar, situata ndërkombëtare po ndikon në çmime.
“Arsyet e rritjes së çmimeve të naftës janë lufta në Iran, rritja e tensioneve, rreziku për ndërprerje të prodhimit dhe problemet në ngushticën e Hormuzit, një nga rrugët më të rëndësishme të kalimit të naftës në botë. Çdo problem në atë koridor reflektohet në tregjet globale dhe reflekton edhe te ne në Kosovë. Nëpër këtë koridor më parë kanë kaluar me qindra anije në ditë, por tani nuk kalojnë më shumë se 4 deri në 5 në ditë, dhe ato me rrezikshmëri të madhe”, tha ai.
Megjithatë Berjani thotë se nuk ka arsye për shqetësim, pasi në Kosovë ka mjaftueshëm derivate dhe çmimet, sipas tij, mbeten ndër më të ulëtat në rajon.
Sidoqoftë siç raporton Kosovapress, rritja po ndihet menjëherë në xhepat e qytetarëve dhe në shumë sektorë të ekonomisë.
Taksisti Nuha Rama thotë se çdo ditë e ka më të vështirë të nxjerrë fitim.
“Nafta është rreth 1 euro e 45 centë. Ne e kemi 2 euro startin për 1 kilometër e gjysmë. Nëse ngec në kolonë, pasagjeri zbret dhe thotë ‘s’kam më shumë se dy euro’. Ndodh që rrimë edhe 3-4 orë në kolonë dhe mezi nxjerrim diçka”, thotë ai.
Edhe qytetarët e tjerë thonë se rritja e çmimit të naftës po reflektohet në gjithë jetën e përditshme. Akif Bllaca thotë se për një vend si Kosova, ku të ardhurat janë të ulëta, çdo rritje e tillë ndihet shumë.
“Rritja e çmimeve të naftës për shtetet e pasura nuk ndikon shumë, por për shtete si i yni, që jemi më të varfër në Evropë, kjo ka ndikim të madh. Kjo lidhet edhe me çmime të tjera, si të bukës, miellit dhe gjitha të tjera. Me pensionet që kemi nuk e dimë si do t’ia dalim, se kerret i kanë ata të pasurit. A të ndikojë, ndikon drejtpërdrejt në ekonominë tonë, ato që nuk mund t’i përballojmë ne. Me naftën dhe me rrymën, të gjitha çmimet po shtrenjtohen”, thotë ai.
