Pavarësisht luhatjeve në Premier League, drejtuesit e Liverpoolit besojnë se skuadra ka potencialin për të fituar të paktën një trofe këtë sezon dhe duan që kjo të reflektohet edhe në rezultate konkrete. Sipas “The Touchline”, hierarkia e klubit i ka bërë të qartë trajnerit Arne Slot se pritshmëria është që Liverpool të mbyllë sezonin me të paktën një trofe në kabinet.
Në këtë kuadër, drejtuesit i kanë kërkuar holandezit që fokusi kryesor të jetë te FA Cup dhe Champions League, dy kompeticionet ku Liverpool shihet se ka shanse reale për të shkuar larg. Ndërkohë, në kampionat, mesazhi është po aq i prerë: Liverpool duhet të sigurojë një vend në Top 4, për të shmangur humbje të mëdha financiare që do të vinin nga mungesa e Champions League sezonin e ardhshëm. Pas 29 ndeshjesh, “The Reds” renditen në vendin e gjashtë me 48 pikë, vetëm tre pikë larg Aston Villës që mban vendin e katërt.
Në Champions League, Liverpool do të përballet me Galatasaray në fazën e 1/16-ave, ndërsa në FA Cup skuadra e Slot pret të mësojë kundërshtarin e çerekfinales, pasi eliminoi Wolves me fitoren 3-1. Me presionin që rritet dhe me pritshmëri të qarta nga drejtuesit, javët në vijim pritet të jenë vendimtare për sezonin e Liverpoolit dhe për vetë Arne Slot.
